mujh pe TuTi jo siyah-raat batane ki nahin

mujh pe TuuTī jo siyah-rāt batāne kī nahīñ

ya.anī ye gardish-e-hālāt batāne kī nahīñ

haañ mirā haal bhī bilkul hai tumhāre jaisā

maan lo baat ki har baat batāne kī nahīñ

dil kī rag rag meñ ghulī jaa.e halāvat jis kī

haa.e vo dard kī sauġhāt batāne kī nahīñ

dhuup ke shahr meñ mere bhī ka.ī din guzre

sar pe barsī thī jo barsāt batāne kī nahīñ

zindagī mast thī tab apnī fazāoñ meñ magan

khelī thī vaqt ne jo ghaat batāne kī nahīñ

maiñ kahānī ko na.e lafz-o-ma.ānī dūñgī

ḳhud pe guzrī huī din-rāt batāne kī nahīñ

vaqt ne kī thī raqam us ghaḌī ik umda misāl

zindagī thī jo tire saath batāne kī nahīñ

jaane anjāne meñ kyā raaz hue haiñ ifshā

yuuñ khulī mujh pe mirī zaat batāne kī nahīñ

zikr meñ lā.ūñ to chhin jaane kā ḳhadsha hai 'sahar'

aa.ī jo shai hai mire haath batāne kī nahīñ

mujh pe TuTi jo siyah-raat batane ki nahin

yani ye gardish-e-haalat batane ki nahin

han mera haal bhi bilkul hai tumhaare jaisa

man lo baat ki har baat batane ki nahin

dil ki rag rag mein ghuli jae halawat jis ki

hae wo dard ki saughat batane ki nahin

dhup ke shahr mein mere bhi kai din guzre

sar pe barsi thi jo barsat batane ki nahin

zindagi mast thi tab apni fazaon mein magan

kheli thi waqt ne jo ghat batane ki nahin

main kahani ko nae lafz-o-maani dungi

KHud pe guzri hui din-raat batane ki nahin

waqt ne ki thi raqam us ghaDi ek umda misal

zindagi thi jo tere sath batane ki nahin

jaane anjaane mein kya raaz hue hain ifsha

yun khuli mujh pe meri zat batane ki nahin

zikr mein laun to chhin jaane ka KHadsha hai 'sahar'

aai jo shai hai mere hath batane ki nahin