مجھ سا گل برز و گل افکار گلستاں میں نہیں

مجھ سا گل برز و گل افکار گلستاں میں نہیں

پھول ہی پھول ہیں کانٹے مرے داماں میں نہیں

یا بتا دیجئے یہ رنگ تغافل کب تک

یا یہ کہہ دیجئے کچھ آپ کے امکاں میں نہیں

دل پریشان ہے ماحول کی غمناکی سے

اب مرے ساتھ کا قیدی کوئی زنداں میں نہیں

آدمیت کی یہ توہین یہ تخریب افسوس

اور سب کچھ ہے محبت دل انساں میں نہیں

آ میں سمجھاؤں تجھے غایت سجدہ کیا ہے

خود کشش سر میں ہو سنگ در جاناں میں نہیں

اپنے ماضی پہ نہ رو حال کو رکھ پیش نظر

اس سفینے کی طرف دیکھ جو طوفاں میں نہیں

رخ ہواؤں نے اس انداز سے بدلا میکشؔ

کوئی آسودہ نشیمن ہی گلستاں میں نہیں