mujhse banta hua tu tujhko banata hua main

mujh se bantā huā tū tujh ko banātā huā maiñ

giit hotā huā tū giit sunātā huā maiñ

ek kuuze ke tasavvur se juḌe ham donoñ

naqsh detā huā tū chaak ghumātā huā maiñ

tum banāo kisī tasvīr meñ koī rasta

maiñ banātā huuñ kahīñ duur se aatā huā maiñ

ek tasvīr kī takmīl ke ham do pahlū

rañg bhartā huā tū rañg banātā huā maiñ

mujh ko le jaa.e kahīñ duur bahātī huī tū

tujh ko le jā.ūñ kahīñ duur uḌātā huā maiñ

ik ibārat hai jo tahrīr nahīñ ho paa.ī

mujh ko likhtā huā tū tujh ko miTātā huā maiñ

mere siine meñ kahīñ ḳhud ko chhupātā huā tū

tere siine se tirā dard churātā huā maiñ

kāñch kā ho ke mire aage bikhartā huā tū

kirchiyoñ ko tirī palkoñ se uThātā huā maiñ

mujh se banta hua tu tujh ko banata hua main

git hota hua tu git sunata hua main

ek kuze ke tasawwur se juDe hum donon

naqsh deta hua tu chaak ghumata hua main

tum banao kisi taswir mein koi rasta

main banata hun kahin dur se aata hua main

ek taswir ki takmil ke hum do pahlu

rang bharta hua tu rang banata hua main

mujh ko le jae kahin dur bahati hui tu

tujh ko le jaun kahin dur uData hua main

ek ibarat hai jo tahrir nahin ho pai

mujh ko likhta hua tu tujh ko miTata hua main

mere sine mein kahin KHud ko chhupata hua tu

tere sine se tera dard churaata hua main

kanch ka ho ke mere aage bikharta hua tu

kirchiyon ko teri palkon se uThata hua main