مجھ سے کہتے نہیں بنتا کہ ستم کم کیجے

مجھ سے کہتے نہیں بنتا کہ ستم کم کیجے

پھر نہ ایسا ہو کسی روز مرا غم کیجے

آپ کے ضبط میں کچھ بات ہو ممکن ہے مگر

کب تلک آنسوؤں کو آپ فراہم کیجے

ہیں کئی اور مسائل بھی جو سلجھانے ہیں

ایک ہی شخص کا اب دھیان ذرا کم کیجے

مر گیا ہوں تو خوشی دیکھتے بنتی ہے مری

آپ زندہ ہیں تو اس بات کا ماتم کیجے

بوندا باندی سے مزید آگ بھڑک اٹھتی ہے

مجھ پہ کیجے کبھی بارش تو جھما جھم کیجے

لوگ کہتے ہیں کہ ہم ٹھیک ہوئے جاتے ہیں

آئیے پھر سے ہمیں درہم و برہم کیجے

آپ کا کام یہاں ختم ہوا ترکشؔ جی

اب کسی دوسری دنیا کو جہنم کیجے