mujhe achchha banana chahta hai

mujhe achchhā banānā chāhtā hai

ye kyā mujh se zamāna chāhtā hai

lahū de kar jise zinda kiyā thā

vahī mujh ko miTānā chāhtā hai

jise ham ne sikhā.ī thī siyāsat

vahī ham ko harānā chāhtā hai

usī se ho rahī hai is meñ dhak-dhak

jise ye dil bhulānā chāhtā hai

bharosa hī nahīñ mujh par tabhī to

vo mujh ko āzmānā chāhtā hai

mohabbat tak nahīñ aatī hai jis ko

vo mujh pe haq jatānā chāhtā hai

idhar ham kar chuke haiñ dil ko patthar

udhar vo dil meñ aanā chāhtā hai

ye kyā zid hai batā 'hassām' āḳhir

tū kyoñ ḳhud ko rulānā chāhtā hai

mujhe achchha banana chahta hai

ye kya mujh se zamana chahta hai

lahu de kar jise zinda kiya tha

wahi mujh ko miTana chahta hai

jise hum ne sikhai thi siyasat

wahi hum ko harana chahta hai

usi se ho rahi hai is mein dhak-dhak

jise ye dil bhulana chahta hai

bharosa hi nahin mujh par tabhi to

wo mujh ko aazmana chahta hai

mohabbat tak nahin aati hai jis ko

wo mujh pe haq jatana chahta hai

idhar hum kar chuke hain dil ko patthar

udhar wo dil mein aana chahta hai

ye kya zid hai bata 'hassam' aaKHir

tu kyon KHud ko rulana chahta hai