مجھے اچھا بنانا چاہتا ہے

مجھے اچھا بنانا چاہتا ہے

یہ کیا مجھ سے زمانہ چاہتا ہے

لہو دے کر جسے زندہ کیا تھا

وہی مجھ کو مٹانا چاہتا ہے

جسے ہم نے سکھائی تھی سیاست

وہی ہم کو ہرانا چاہتا ہے

اسی سے ہو رہی ہے اس میں دھک دھک

جسے یہ دل بھلانا چاہتا ہے

بھروسہ ہی نہیں مجھ پر تبھی تو

وہ مجھ کو آزمانا چاہتا ہے

محبت تک نہیں آتی ہے جس کو

وہ مجھ پہ حق جتانا چاہتا ہے

ادھر ہم کر چکے ہیں دل کو پتھر

ادھر وہ دل میں آنا چاہتا ہے

یہ کیا ضد ہے بتا حسامؔ آخر

تو کیوں خود کو رلانا چاہتا ہے