mujhe baKHshi KHuda ne kaun rokega zaban meri

mujhe baḳhshī ḳhudā ne kaun rokegā zabāñ merī

tumheñ har haal meñ sunñī paḌegī dāstāñ merī

kabhī to shāhrāh-e-zindagī thī kahkashāñ merī

magar ab kārvāñ merā na gard-e-kārvāñ merī

abhī logoñ ke dil meñ ḳhaar kī sūrat khaTaktā huuñ

abhī tak yaad hai ahl-e-chaman ko dāstāñ merī

mire guzre hue tevar abhī bhūlī nahīñ duniyā

abhī bikhrī huī haiñ har taraf parchhā.iyāñ merī

mirī āñkhoñ meñ aañsū haiñ na hoñToñ pe tabassum hai

samajh meñ kyā kisī ke aa.egī tarz-e-fuġhāñ merī

mirī fitrat ko kyā samjheñge ye ḳhvāb-e-girāñ vaale

savere ke sitāre kī chamak hai rāz-dāñ merī

tirī rāh-e-talab meñ zaḳhm sab siine pe khaa.e haiñ

bahār-e-gulsitāñ merī hayāt-e-jāvidāñ merī

mujhe baKHshi KHuda ne kaun rokega zaban meri

tumhein har haal mein sunni paDegi dastan meri

kabhi to shahrah-e-zindagi thi kahkashan meri

magar ab karwan mera na gard-e-karwan meri

abhi logon ke dil mein KHar ki surat khaTakta hun

abhi tak yaad hai ahl-e-chaman ko dastan meri

mere guzre hue tewar abhi bhuli nahin duniya

abhi bikhri hui hain har taraf parchhaiyan meri

meri aankhon mein aansu hain na honTon pe tabassum hai

samajh mein kya kisi ke aaegi tarz-e-fughan meri

meri fitrat ko kya samjhenge ye KHwab-e-giran wale

sawere ke sitare ki chamak hai raaz-dan meri

teri rah-e-talab mein zaKHm sab sine pe khae hain

bahaar-e-gulsitan meri hayat-e-jawidan meri