mujhe be-KHanma kar ke pasheman wo na yun hota

mujhe be-ḳhānmā kar ke pashemāñ vo na yuuñ hotā

agar merī tabāhī se use hāsil sukūñ hotā

mujhe āsūdgī baḳhshī thī merī ḳhasta-hālī ne

mire hoñToñ pe kyoñ kar shikva-e-hāl-e-zubūñ hotā

dar-e-mun.im pe jhuk kar sarfarāzī hotī jo hāsil

maiñ aisī sarfarāzī ke liye kyoñ sar-nigūñ hotā

ḳhirad ke sāmne hotī na rusvā.ī kabhī us kī

agar josh-e-junūñ vāqif ba-ādāb-e-junūñ hotā

vahī ho ke rahā āḳhir jo honā thā mire haq meñ

ab is par rañj kyā karnā ki yuuñ hotā na yuuñ hotā

agar maiñ sāhir-e-fan hotā apne ahd kā sābir

asar-andāz logoñ par mire fan kā fusūñ hotā

mujhe be-KHanma kar ke pasheman wo na yun hota

agar meri tabahi se use hasil sukun hota

mujhe aasudgi baKHshi thi meri KHasta-haali ne

mere honTon pe kyon kar shikwa-e-haal-e-zubun hota

dar-e-munim pe jhuk kar sarfaraazi hoti jo hasil

main aisi sarfaraazi ke liye kyon sar-nigun hota

KHirad ke samne hoti na ruswai kabhi us ki

agar josh-e-junun waqif ba-adab-e-junun hota

wahi ho ke raha aaKHir jo hona tha mere haq mein

ab is par ranj kya karna ki yun hota na yun hota

agar main sahir-e-fan hota apne ahd ka sabir

asar-andaz logon par mere fan ka fusun hota