mujhe Dhae chala ja mujhko banae chala ja

mujhe Dhaa.e chalā jā mujh ko banā.e chalā jā

dil lagānā tujhe aatā hai lagā.e chalā jā

mere qadmoñ se tū do chaar qadam pīchhe chal

mere girte hue lamhoñ ko uThā.e chalā jā

nā-mayassar kā bhī ho naam mayassar kā bhī

maiñ bulā.e chalā jaatā huuñ tū aa.e chalā jā

ham ki jalne pe bhī tayyār haiñ Dhalne par bhī

kaam jaise tirā chaltā hai chalā.e chalā jā

ai mire ġhā.eb-o-ġharqāb ye haq terā hai

jitnī uTh saktī hai ye lahr uThā.e chalā jā

ab tire dekhne vāloñ meñ koī hai ki nahīñ

maiñ na kahtā thā mirī ḳhaak uḌaa.e chalā jā

sab tamāsha mire zimme hai mire jism-nazhād

tū ne bas vaqt bitānā hai bitā.e chalā jā

ye tirī dhun meñ jo guzre to guzarnā aa jaa.e

is zamīñ-zād ko itnā tū sadhā.e chalā jā

mujhe Dhae chala ja mujh ko banae chala ja

dil lagana tujhe aata hai lagae chala ja

mere qadmon se tu do chaar qadam pichhe chal

mere girte hue lamhon ko uThae chala ja

na-mayassar ka bhi ho nam mayassar ka bhi

main bulae chala jata hun tu aae chala ja

hum ki jalne pe bhi tayyar hain Dhalne par bhi

kaam jaise tera chalta hai chalae chala ja

ai mere ghaeb-o-gharqab ye haq tera hai

jitni uTh sakti hai ye lahr uThae chala ja

ab tere dekhne walon mein koi hai ki nahin

main na kahta tha meri KHak uDae chala ja

sab tamasha mere zimme hai mere jism-nazhad

tu ne bas waqt bitana hai bitae chala ja

ye teri dhun mein jo guzre to guzarna aa jae

is zamin-zad ko itna tu sadhae chala ja