mujhe KHabar hai rulaegi zar-zar mujhe

mujhe ḳhabar hai rulā.egī zār-zār mujhe

ye ek-tarfa mohabbat to degī maar mujhe

taras ga.ī huuñ tire lams kī tamāzat ko

na munjamid kahīñ kar de ye intizār mujhe

mujhe nahīñ hai mohabbat meñ devtā honā

maiñ thak chukī huuñ ab is auj se utaar mujhe

kabhī to dekh tire dar pe aan baiThī huuñ

kabhī to apne ġhulāmoñ meñ kar shumār mujhe

na diijo 'ishq meñ mujh ko qanā'atoñ kā sabaq

ki chāhiye hai tirā lutf be-shumār mujhe

basar karūñ tirī qurbat meñ apnī 'umr tamām

maiñ chāhatoñ se bharā vaqt huuñ guzār mujhe

qarār dil ko mayassar na chain tan ko mire

lagāyā 'ishq ne kaisā ye iztirār mujhe

suḳhan ko miltī hai tāsīr khilte zaḳhmoñ se

ye ranj-o-ġham to hue ḳhuub sāzgār mujhe

kabhī to khul ke kare baat khal gayā 'nasrīñ'

suḳhan ke baab meñ us kā ye iḳhtisār mujhe

mujhe KHabar hai rulaegi zar-zar mujhe

ye ek-tarfa mohabbat to degi mar mujhe

taras gai hun tere lams ki tamazat ko

na munjamid kahin kar de ye intizar mujhe

mujhe nahin hai mohabbat mein dewta hona

main thak chuki hun ab is auj se utar mujhe

kabhi to dekh tere dar pe aan baiThi hun

kabhi to apne ghulamon mein kar shumar mujhe

na dijo 'ishq mein mujh ko qana'aton ka sabaq

ki chahiye hai tera lutf be-shumar mujhe

basar karun teri qurbat mein apni 'umr tamam

main chahaton se bhara waqt hun guzar mujhe

qarar dil ko mayassar na chain tan ko mere

lagaya 'ishq ne kaisa ye iztirar mujhe

suKHan ko milti hai tasir khilte zaKHmon se

ye ranj-o-gham to hue KHub sazgar mujhe

kabhi to khul ke kare baat khal gaya 'nasrin'

suKHan ke bab mein us ka ye iKHtisar mujhe