مجھے معلوم ہے میں آج کیا ہوں

مجھے معلوم ہے میں آج کیا ہوں

خدا ہوں پر ابھی سویا ہوا ہوں

سر محفل میں یوں خاموش رہ کر

سبھی لوگوں کے تیور دیکھتا ہوں

مرا مذہب فقط انسانیت ہے

جسے ہر حال میں میں پوجتا ہوں

نہیں اس راستے کا کوئی رہبر

کہ جس رستے پہ اب میں چل پڑا ہوں

مجھے سب دیکھ کر حیران کیوں ہیں

میں قاتل ہوں کوئی یا دیوتا ہوں

برا کہنے سے پہلے سوچ لینا

میں جیسا بھی ہوں لیکن آپ کا ہوں

مجھے تم میرے اندر ڈھونڈھتے ہو

پر اک عرصے سے میں تو لاپتہ ہوں