muKHtasar ishq hai is mein bahut arsa nahin hai

muḳhtasar 'ishq hai is meñ bahut 'arsa nahīñ hai

jaise bas jism hai aur ruuh kā ḳharcha nahīñ hai

in dinoñ aisī mahārat meñ hai mash.hūr koī

jis kā is shahr ke qātil ne bhī sochā nahīñ hai

aa to jaate haiñ sabhī us ke tasarruf meñ magar

maan jaate haiñ ki vo aadmī achchhā nahīñ hai

ai mire dil kī zamīnoñ ke nigahbān ḳhudā

kyā mire naam pe thoḌā sā bhī raqba nahīñ hai

maar dete haiñ yahī log adā se apnī

aur kahte haiñ ki aadam kā bharosa nahīñ hai

pahle rakkheñge mohabbat kī jagah ḳhāmoshī

phir kaheñge ki mirī jaan ye dhokā nahīñ hai

kaise samjhā.eñ ki barbād hue haiñ kaise

tū ne us aañkh ko uThte kabhī dekhā nahīñ hai

muKHtasar 'ishq hai is mein bahut 'arsa nahin hai

jaise bas jism hai aur ruh ka KHarcha nahin hai

in dinon aisi mahaarat mein hai mashhur koi

jis ka is shahr ke qatil ne bhi socha nahin hai

aa to jate hain sabhi us ke tasarruf mein magar

man jate hain ki wo aadmi achchha nahin hai

ai mere dil ki zaminon ke nigahban KHuda

kya mere nam pe thoDa sa bhi raqba nahin hai

mar dete hain yahi log ada se apni

aur kahte hain ki aadam ka bharosa nahin hai

pahle rakkhenge mohabbat ki jagah KHamoshi

phir kahenge ki meri jaan ye dhoka nahin hai

kaise samjhaen ki barbaad hue hain kaise

tu ne us aankh ko uThte kabhi dekha nahin hai