munjamid honTon pe hai yaKH ki tarah harf-e-junun

munjamid hoñToñ pe hai yaḳh kī tarah harf-e-junūñ

sar kisī seal-zada shāḳh ke mānind nigūñ

kahāñ surmā-nafas alfāz kahāñ soz-e-darūñ

lāla-e-dasht-e-zamistāñ hai maiñ jo baat kahūñ

maiñ kahāñ pahuñchā ki har but jise puujā ab tak

hai shikasta sar-e-ḳhāk aur maiñ shikasta to huuñ

rahm kar ḳhvāb-e-tamannā pe nigāh-e-nigarāñ

TuuT kar chāroñ taraf bikhre paḌe haiñ afsūñ

ḳhisht-kobī meñ kise fursat-e-ḳhvāb-e-ḳhūbāñ

zinda rahne ke taqāzoñ ne kiyā ziist kā ḳhuuñ

kitne aqdār ke aivān zamīñ-bos hue

āgahī raakh kā ik Dher huī jaatī hai kyuuñ

kitne armān zamistāñ-zada shāḳhoñ kī tarah

haath phailā.e hue takte haiñ sū-e-gardūñ

shab ajab-soḳhta-sāmān musāfir aa.e

jism āġhushta-ba-ḳhūñ chehre malūl-o-mahzūñ

bole ai ajnabī ai saada tamannā hameñ dekh

ham bhī rakhte the kabhī ārzūeñ gūnā-gūñ

aur phir ham pe khulā vaqt kī raftār kā raaz

ab koī rañg koī ruup nahīñ vaj.h-e-sukūñ

bujh ga.iiñ ārzūeñ shaam ke bādal kī tarah

gulshan-o-shahr hue barf kī tah meñ madfūñ

jā-ba-jā hausle tārāj hue dil TuuTe

pai-ba-pai ham ne sahe sard havā ke shab-ḳhūñ

zindagī mahz shikastoñ kā ik ambār-e-girāñ

ab in āñkhoñ meñ nahīñ koī tilism-e-fayakūñ

ham to ai ajnabī mehmān haiñ koī dam ke

dam-ba-dam mauj-e-fanā kahtī hai maiñ huuñ maiñ huuñ

sub.h-dam soḳhta-sāmān musāfir bhī ga.e

phir vahī ham vahī tanhā.ī vahī hāl-e-zabūñ

munjamid honTon pe hai yaKH ki tarah harf-e-junun

sar kisi seal-zada shaKH ke manind nigun

kahan surma-nafas alfaz kahan soz-e-darun

lala-e-dasht-e-zamistan hai main jo baat kahun

main kahan pahuncha ki har but jise puja ab tak

hai shikasta sar-e-KHak aur main shikasta to hun

rahm kar KHwab-e-tamanna pe nigah-e-nigaran

TuT kar chaaron taraf bikhre paDe hain afsun

KHisht-kobi mein kise fursat-e-KHwab-e-KHuban

zinda rahne ke taqazon ne kiya zist ka KHun

kitne aqdar ke aiwan zamin-bos hue

aagahi rakh ka ek Dher hui jati hai kyun

kitne arman zamistan-zada shaKHon ki tarah

hath phailae hue takte hain su-e-gardun

shab ajab-soKHta-saman musafir aae

jism aaghushta-ba-KHun chehre malul-o-mahzun

bole ai ajnabi ai sada tamanna hamein dekh

hum bhi rakhte the kabhi aarzuen guna-gun

aur phir hum pe khula waqt ki raftar ka raaz

ab koi rang koi rup nahin wajh-e-sukun

bujh gain aarzuen sham ke baadal ki tarah

gulshan-o-shahr hue barf ki tah mein madfun

ja-ba-ja hausle taraj hue dil TuTe

pai-ba-pai hum ne sahe sard hawa ke shab-KHun

zindagi mahz shikaston ka ek ambar-e-giran

ab in aankhon mein nahin koi tilism-e-fayakun

hum to ai ajnabi mehman hain koi dam ke

dam-ba-dam mauj-e-fana kahti hai main hun main hun

subh-dam soKHta-saman musafir bhi gae

phir wahi hum wahi tanhai wahi haal-e-zabun