منتقل ہو گئی پھر روح ہوا کچھ بھی نہیں

منتقل ہو گئی پھر روح ہوا کچھ بھی نہیں

اک نیا اور بدن اور نیا کچھ بھی نہیں

اس لیے میں نے مصیبت میں پکارا ہے تجھے

نام کے آگے ترے حرف دعا کچھ بھی نہیں

میرے نزدیک نہیں میرے علاوہ کچھ بھی

تیرے نزدیک بھی کیا تیرے سوا کچھ بھی نہیں

تم یہاں آئے تھے ٹھہرے تھے چلے بھی گئے تھے

درمیاں اس کے مگر ہم نے کیا کچھ بھی نہیں

اک طرف جلتے رہے ایک طرف روتے رہے

خاک بھی کچھ نہ ہوا اور بجھا کچھ بھی نہیں

جتنے دروازے تھے دل کے وہ مقفل نکلے

بند ہی بند تھا سب یعنی کھلا کچھ بھی نہیں