musalsal mujassam duaen salamat rahen

musalsal mujassam du'ā.eñ salāmat raheñ

salāmat raheñ sab kī maa.eñ salāmat raheñ

hamāre bhī hai aage pīchhe koī kah sakeñ

ye jo log haiñ dā.eñ-bā.eñ salāmat raheñ

agar saath chalnā hai aa.eñ jī ḳhush-āmdīd

agar jā rahe haiñ to jaa.eñ salāmat raheñ

mire ghar ke darvāze par bhī huiiñ dastakeñ

galī se guzartī havā.eñ salāmat raheñ

salāmat haiñ sab mahfileñ in ke Dar ke tufail

ye tanhā.ī jaisī balā.eñ salāmat raheñ

tujhe ḳhāmushī kā pata hī nahīñ varna tū

mire saath kahtā sadā.eñ salāmat raheñ

vo dil jo dhaḌakte haiñ patthar nahīñ un kī ḳhair

vo āñkheñ jo aañsū bahā.eñ salāmat raheñ

ḳhud aatā thā pahle aur is baar bas ik payām

janam-din kī shubhkāmnā.eñ salāmat raheñ

mirā kyā hai pahle se TuuTā huā huuñ 'umair'

bas in dostoñ kī anā.eñ salāmat raheñ

musalsal mujassam du'aen salamat rahen

salamat rahen sab ki maen salamat rahen

hamare bhi hai aage pichhe koi kah saken

ye jo log hain daen-baen salamat rahen

agar sath chalna hai aaen ji KHush-amdid

agar ja rahe hain to jaen salamat rahen

mere ghar ke darwaze par bhi huin dastaken

gali se guzarti hawaen salamat rahen

salamat hain sab mahfilen in ke Dar ke tufail

ye tanhai jaisi balaen salamat rahen

tujhe KHamushi ka pata hi nahin warna tu

mere sath kahta sadaen salamat rahen

wo dil jo dhaDakte hain patthar nahin un ki KHair

wo aankhen jo aansu bahaen salamat rahen

KHud aata tha pahle aur is bar bas ek payam

janam-din ki shubhkaamnaen salamat rahen

mera kya hai pahle se TuTa hua hun 'umair'

bas in doston ki anaen salamat rahen