musawwir mumkin-o-imkan ka paikar banata hai

musavvir mumkin-o-imkān kā paikar banātā hai

mirī tasvīr vo mujh se bahut behtar banātā hai

use aatā hai rakhnā naqsh meñ tajdīd kā 'unsur

purāne canvas par nit-na.e manzar banātā hai

safar kartā hai ḳhārij kī taraf har naqsh-e-dāḳhil se

mire bāhar kā manzar vo mire andar banātā hai

banā detā hai pahle ḳhuun se ik jism kāġhaz par

phir us ke baa'd vo tasvīr meñ ḳhanjar banātā hai

ham ahl-e-āgahī sajda nahīñ tajsīm kar sakte

hameñ mā'lūm hai patthar se kyā aazar banātā hai

hamārī sarkashī kī had use mā'lūm kyā 'āsim'

vo sāda-ḳhū hathelī par hamārā sar banātā hai

musawwir mumkin-o-imkan ka paikar banata hai

meri taswir wo mujh se bahut behtar banata hai

use aata hai rakhna naqsh mein tajdid ka 'unsur

purane canwas par nit-nae manzar banata hai

safar karta hai KHarij ki taraf har naqsh-e-daKHil se

mere bahar ka manzar wo mere andar banata hai

bana deta hai pahle KHun se ek jism kaghaz par

phir us ke ba'd wo taswir mein KHanjar banata hai

hum ahl-e-agahi sajda nahin tajsim kar sakte

hamein ma'lum hai patthar se kya aazar banata hai

hamari sarkashi ki had use ma'lum kya 'asim'

wo sada-KHu hatheli par hamara sar banata hai