musibaton mein main KHud ko Dhaaras bandha rahi thi to tum kahan the

musībatoñ meñ maiñ ḳhud ko Dhāras bañdhā rahī thī to tum kahāñ the

qadam qadam par mujhe ye duniyā satā rahī thī to tum kahāñ the

hatheliyoñ se haiñ ashk poñchhe hatheliyoñ se haiñ muñh chhupā.e

sisak sisak kar maiñ tanhā aañsū bahā rahī thī to tum kahāñ the

maiñ apne pairoñ pe jab khaḌī thī to tum mire saath chal rahe the

mujhe safar meñ har ek Thokar girā rahī thī to tum kahāñ the

maiñ gir ke uThnā phir uTh ke chalnā ḳhud apne dam par huuñ siikh paa.ī

mujhe aqārib kī chāl-bāzī harā rahī thī to tum kahāñ the

badal chukī huuñ maiñ raah apnī palaT ke vāpas na aa sakūñgī

tumhārī rāhoñ se ḳhud ko pīchhe haTā rahī thī to tum kahāñ the

ab aa.e ho jaañ nisār karne mohabbatoñ kā hisāb karne

mohabbatoñ se maiñ jab tumhīñ ko bulā rahī thī to tum kahāñ the

huī hai lāhaq ye fikr kaise tumheñ mirī ab samajh na aa.ī

'sanā' jo ḳhvārī se apnā dāman bachā rahī thī to tum kahāñ the

musibaton mein main KHud ko Dhaaras bandha rahi thi to tum kahan the

qadam qadam par mujhe ye duniya sata rahi thi to tum kahan the

hatheliyon se hain ashk ponchhe hatheliyon se hain munh chhupae

sisak sisak kar main tanha aansu baha rahi thi to tum kahan the

main apne pairon pe jab khaDi thi to tum mere sath chal rahe the

mujhe safar mein har ek Thokar gira rahi thi to tum kahan the

main gir ke uThna phir uTh ke chalna KHud apne dam par hun sikh pai

mujhe aqarib ki chaal-bazi hara rahi thi to tum kahan the

badal chuki hun main rah apni palaT ke wapas na aa sakungi

tumhaari rahon se KHud ko pichhe haTa rahi thi to tum kahan the

ab aae ho jaan nisar karne mohabbaton ka hisab karne

mohabbaton se main jab tumhin ko bula rahi thi to tum kahan the

hui hai lahaq ye fikr kaise tumhein meri ab samajh na aai

'sana' jo KHwari se apna daman bacha rahi thi to tum kahan the