muskura kar sawal karte hain

muskurā kar savāl karte haiñ

aap mujh ko niDhāl karte haiñ

mere hāthoñ pe rakh ke haath apne

mere gāloñ ko laal karte haiñ

maiñ to bīmār huuñ ka.ī din se

merā kyā vo ḳhayāl karte haiñ

kuchh kareñ yā nahīñ kareñ lekin

baat to be-misāl karte haiñ

baiThe rahte haiñ āstīnoñ meñ

dost bhī kyā kamāl karte haiñ

mere hoñToñ pe rakh ke haath apne

phir mujhī se savāl karte haiñ

roz ik mudda'ā nayā pā kar

roz ḳhud ko niDhāl karte haiñ

un ke jaise to ābgīnoñ meñ

saañs lenā muhāl karte haiñ

ham sarāpā hī aarzū haiñ par

apne hāthoñ kā haal karte haiñ

apne is dil kī baat karne meñ

kuchh bhī kahnā muhāl karte haiñ

muskura kar sawal karte hain

aap mujh ko niDhaal karte hain

mere hathon pe rakh ke hath apne

mere galon ko lal karte hain

main to bimar hun kai din se

mera kya wo KHayal karte hain

kuchh karen ya nahin karen lekin

baat to be-misal karte hain

baiThe rahte hain aastinon mein

dost bhi kya kamal karte hain

mere honTon pe rakh ke hath apne

phir mujhi se sawal karte hain

roz ek mudda'a naya pa kar

roz KHud ko niDhaal karte hain

un ke jaise to aabginon mein

sans lena muhaal karte hain

hum sarapa hi aarzu hain par

apne hathon ka haal karte hain

apne is dil ki baat karne mein

kuchh bhi kahna muhaal karte hain