mustaqil did ki ye shakl nazar aai hai

mustaqil diid kī ye shakl nazar aa.ī hai

dil meñ ab aap kī tasvīr utar aa.ī hai

tū ne kis lutf se chheḌā hai unheñ mauj-e-nasīm

jhuum kar zulf-e-siyah tā-ba-kamar aa.ī hai

kah rahe haiñ tirī āñkhoñ ke badalte tevar

ye hañsī aaj ba-andāz-e-digar aa.ī hai

zindagī naach ki vo jān-e-chaman jān-e-bahār

dast-e-rañgīñ meñ liye sāġhar-e-zar aa.ī hai

dil ho masrūr ki āġhosh-e-ḳhizāñ-dīda meñ phir

lahlahātī huī shāḳh-e-gul-e-tar aa.ī hai

vo za-sar-tā-ba-qadam husn kī ik aab liye

jagmagātī huī mānind-e-guhar aa.ī hai

ho na hairāñ ki añdhere haiñ ujāloñ kī dalīl

shaam ke ba.ad hī ai dost sahar aa.ī hai

ban ke ġharqāb safīne kī machaltī huī yaad

sīna-e-bahar pe ik mauj ubhar aa.ī hai

karam-e-rahbar-e-sādiq ke nisār ai 'muztar'

zindagī saḳht marāhil se guzar aa.ī hai

mustaqil did ki ye shakl nazar aai hai

dil mein ab aap ki taswir utar aai hai

tu ne kis lutf se chheDa hai unhen mauj-e-nasim

jhum kar zulf-e-siyah ta-ba-kamar aai hai

kah rahe hain teri aankhon ke badalte tewar

ye hansi aaj ba-andaz-e-digar aai hai

zindagi nach ki wo jaan-e-chaman jaan-e-bahaar

dast-e-rangin mein liye saghar-e-zar aai hai

dil ho masrur ki aaghosh-e-KHizan-dida mein phir

lahlahati hui shaKH-e-gul-e-tar aai hai

wo za-sar-ta-ba-qadam husn ki ek aab liye

jagmagati hui manind-e-guhar aai hai

ho na hairan ki andhere hain ujalon ki dalil

sham ke baad hi ai dost sahar aai hai

ban ke gharqab safine ki machalti hui yaad

sina-e-bahar pe ek mauj ubhar aai hai

karam-e-rahbar-e-sadiq ke nisar ai 'muztar'

zindagi saKHt marahil se guzar aai hai