mutarannim hai meri ruh mein yun teri sada

mutarannim hai mirī ruuh meñ yuuñ terī sadā

ābshāroñ kī sukūñ-rez ravānī jaise

nūr-o-nik.hat meñ nahāyā huā vo terā kalām

rūd-e-kausar kā chamaktā huā paanī jaise

merī palkoñ pe haiñ yuuñ gauhar-e-shabnam ġhaltāñ

mere hoñToñ pe ho phūloñ kī kahānī jaise

mere sāñsoñ meñ machaltī hai hinā kī ḳhushbū

terī nau-ḳhez mohabbat kī nishānī jaise

kitnā ḳhush-rañg hai ma.asūm tabassum terā

muskurātī ho bahāroñ kī javānī jaise

bas gayā mere tasavvur meñ hayūlā terā

zehn-e-shā.ir meñ koī yaad suhānī jaise

dil ke āñgan meñ ubhartā hai tirā aks-e-jamīl

chāñdnī-rāt meñ ho raat kī raanī jaise

mutarannim hai meri ruh mein yun teri sada

aabshaaron ki sukun-rez rawani jaise

nur-o-nikhat mein nahaya hua wo tera kalam

rud-e-kausar ka chamakta hua pani jaise

meri palkon pe hain yun gauhar-e-shabnam ghaltan

mere honTon pe ho phulon ki kahani jaise

mere sanson mein machalti hai hina ki KHushbu

teri nau-KHez mohabbat ki nishani jaise

kitna KHush-rang hai masum tabassum tera

muskuraati ho bahaaron ki jawani jaise

bas gaya mere tasawwur mein hayula tera

zehn-e-shair mein koi yaad suhani jaise

dil ke aangan mein ubharta hai tera aks-e-jamil

chandni-raat mein ho raat ki rani jaise