mutmain hun main agar hai qadr mere kaam ki

mutma.in huuñ maiñ agar hai qadr mere kaam kī

shā'irī meñ kyā zarūrat hai kisī in'ām kī

phir bhī un ko jaane kyā kyā mil gayā hai be-hisāb

koī koshish kī na mehnat hī barā.e-nām kī

thak gayā huuñ yā koī lambā safar darpesh hai

kuchh dinoñ se fikr lāhaq hai mujhe ārām kī

vo ḳhudā hai jo bhī jī meñ aa.e kartā hai miyāñ

ibtidā hī kuchh nahīñ to fikr kyā anjām kī

kis qadar nuqsān uThāyā soch kar rotā huuñ maiñ

kuchh dinoñ jo 'umr apnī mubtalā-e-jām kī

kaise kaise mas.ale lahrā rahe haiñ zehn meñ

sub.h se tasvīr bantī jā rahī hai shaam kī

sab se achchhā hai yahī maz.hab nahīñ gardānte

shādiyāñ karne ko lete haiñ madad islām kī

naam meñ kuchh bhī nahīñ rakkhā ġhalat hai 'irtizā'

kis qadar 'izzat hai duniyā meñ mohammad naam kī

mutmain hun main agar hai qadr mere kaam ki

sha'iri mein kya zarurat hai kisi in'am ki

phir bhi un ko jaane kya kya mil gaya hai be-hisab

koi koshish ki na mehnat hi barae-nam ki

thak gaya hun ya koi lamba safar darpesh hai

kuchh dinon se fikr lahaq hai mujhe aaram ki

wo KHuda hai jo bhi ji mein aae karta hai miyan

ibtida hi kuchh nahin to fikr kya anjam ki

kis qadar nuqsan uThaya soch kar rota hun main

kuchh dinon jo 'umr apni mubtala-e-jam ki

kaise kaise masale lahra rahe hain zehn mein

subh se taswir banti ja rahi hai sham ki

sab se achchha hai yahi mazhab nahin gardante

shadiyan karne ko lete hain madad islam ki

nam mein kuchh bhi nahin rakkha ghalat hai 'irtiza'

kis qadar 'izzat hai duniya mein mohammad nam ki