mutrib se nawa ruTh gai hai to mujhe kya

mutrib se navā ruuTh ga.ī hai to mujhe kyā

ye sham.a agar jal ke bujhī hai to mujhe kyā

maiñ koh-o-bayābāñ kā chahaktā huā panchhī

har shāḳh-e-chaman phūlī-phalī hai to mujhe kyā

mausam kī hasīñ taal pe nācheñgī fazā.eñ

ye baat kisī gul ne kahī hai to mujhe kyā

ḳhushbū se hai ḳhālī abhī dāmān-e-tasavvur

tū bāġh-e-tamannā kī kalī hai to mujhe kyā

hai faḳhr abhī apne buḌhāpe ke lahū par

shīshe meñ tire lāl-parī hai to mujhe kyā

ai dost maiñ kab thā ġham-e-hālāt ke taabe

hālāt kī raftār vahī hai to mujhe kyā

maqsūd faqat dast-e-tasavvur kī ziyārat

tasvīr meñ rangoñ kī kamī hai to mujhe kyā

dam toḌ diyā zauq-e-tamannā ne taḌap kar

qātil kī nazar jaam banī hai to mujhe kyā

hotī hai adā rasm kahīñ merī balā se

parvān na.ī riit chaḌhī hai to mujhe kyā

maiñ pyaar ke zaḳhmoñ kā parastār huuñ gul-chīñ

idrāk kī shādāb kalī hai to mujhe kyā

ḳhātir meñ talātum ko bhī laatā nahīñ hamdam

kashtī koī sāhil pe lagī hai to mujhe kyā

raushan hai mire dil meñ tirī yaad kā sūraj

jugnū kī shab-e-ġham se Thanī hai to mujhe kyā

'muftī' mirī āñkhoñ ne faqat ashk bahā.e

hāsil tujhe duniyā kī ḳhushī hai to mujhe kyā

mutrib se nawa ruTh gai hai to mujhe kya

ye shama agar jal ke bujhi hai to mujhe kya

main koh-o-bayaban ka chahakta hua panchhi

har shaKH-e-chaman phuli-phali hai to mujhe kya

mausam ki hasin tal pe nachengi fazaen

ye baat kisi gul ne kahi hai to mujhe kya

KHushbu se hai KHali abhi daman-e-tasawwur

tu bagh-e-tamanna ki kali hai to mujhe kya

hai faKHr abhi apne buDhape ke lahu par

shishe mein tere lal-pari hai to mujhe kya

ai dost main kab tha gham-e-haalat ke tabe

haalat ki raftar wahi hai to mujhe kya

maqsud faqat dast-e-tasawwur ki ziyarat

taswir mein rangon ki kami hai to mujhe kya

dam toD diya zauq-e-tamanna ne taDap kar

qatil ki nazar jam bani hai to mujhe kya

hoti hai ada rasm kahin meri bala se

parwan nai rit chaDhi hai to mujhe kya

main pyar ke zaKHmon ka parastar hun gul-chin

idrak ki shadab kali hai to mujhe kya

KHatir mein talatum ko bhi lata nahin hamdam

kashti koi sahil pe lagi hai to mujhe kya

raushan hai mere dil mein teri yaad ka suraj

jugnu ki shab-e-gham se Thani hai to mujhe kya

'mufti' meri aankhon ne faqat ashk bahae

hasil tujhe duniya ki KHushi hai to mujhe kya