na ahl-e-dil hain na fikr-o-nigah wale hain

na ahl-e-dil haiñ na fikr-o-nigāh vaale haiñ

hamāre shahr meñ sab ḳhānqāh vaale haiñ

jo guftugū hai vo ḳhālis ġhinā-o-faqr kī hai

jo paiñtare haiñ faqat hubb-e-jāh vaale haiñ

jo nek-dil haiñ asāġhir meñ hai shumār un kā

kabīr log kabīra gunāh vaale haiñ

hameñ bhī apne sivā kuchh nazar nahīñ aatā

ḳhudā kā shukr hai ham bhī nigāh vaale haiñ

'ajīb shahr hai ghar to haiñ 'āmiyāna magar

lavāzimāt sabhī husn-gāh vaale haiñ

ye makr-o-fan haiñ tahā.if na.e tamaddun ke

ye sab khilaune isī kār-gāh vaale haiñ

jalā.ūñ kaise yahāñ apne fikr-o-fan kā charāġh

suḳhan-farosh baḌī rasm-o-rāh vaale haiñ

hunar se apne qad-āvar nahīñ yahāñ koī

sab apne zo'm meñ ūñchī kulāh vaale haiñ

na ahl-e-dil hain na fikr-o-nigah wale hain

hamare shahr mein sab KHanqah wale hain

jo guftugu hai wo KHalis ghina-o-faqr ki hai

jo paintare hain faqat hubb-e-jah wale hain

jo nek-dil hain asaghir mein hai shumar un ka

kabir log kabira gunah wale hain

hamein bhi apne siwa kuchh nazar nahin aata

KHuda ka shukr hai hum bhi nigah wale hain

'ajib shahr hai ghar to hain 'amiyana magar

lawazimat sabhi husn-gah wale hain

ye makr-o-fan hain tahaif nae tamaddun ke

ye sab khilaune isi kar-gah wale hain

jalaun kaise yahan apne fikr-o-fan ka charagh

suKHan-farosh baDi rasm-o-rah wale hain

hunar se apne qad-awar nahin yahan koi

sab apne zo'm mein unchi kulah wale hain