na be-ruKHi kabhi barti na iltifat kiya

na be-ruḳhī kabhī bartī na iltifāt kiyā

sulūk us ne masāvī hamāre saath kiyā

sadā-bahār rahā baaġh garche phūloñ ne

bahut kiyā to ghaḌī do-ghaḌī sabāt kiyā

tire baġhair ta'ajjub hai kis tarah maiñ ne

sahar ko shaam kiyā aur din ko raat kiyā

bas ik tujhe na kisī taur pā sake varna

ḳhudā gavāh muhāloñ ko mumkināt kiyā

tire tapāk kā haq aur kyā adā karte

bayān ārzūoñ ko bhī vāqi'āt kiyā

hayāt kam thī magar rā.egāñ na jaane dī

jihād marg-e-musalsal se tā-hayāt kiyā

kal us ne bazm meñ dekhā mujhe zarūr magar

nazar churā ke lihāz-e-ta'alluqāt kiyā

'shu’ūr' aah na ash'ār meñ kiyā mahfūz

ḳhazāna tum ne jo sarf-e-mukālamāt kiyā

na be-ruKHi kabhi barti na iltifat kiya

suluk us ne masawi hamare sath kiya

sada-bahaar raha bagh garche phulon ne

bahut kiya to ghaDi do-ghaDi sabaat kiya

tere baghair ta'ajjub hai kis tarah main ne

sahar ko sham kiya aur din ko raat kiya

bas ek tujhe na kisi taur pa sake warna

KHuda gawah muhaalon ko mumkinat kiya

tere tapak ka haq aur kya ada karte

bayan aarzuon ko bhi waqi'at kiya

hayat kam thi magar raegan na jaane di

jihad marg-e-musalsal se ta-hayat kiya

kal us ne bazm mein dekha mujhe zarur magar

nazar chura ke lihaz-e-ta'alluqat kiya

'shu’ur' aah na ash'ar mein kiya mahfuz

KHazana tum ne jo sarf-e-mukalamat kiya