na jaane kab basar hue na jaane kab guzar gae

na jaane kab basar hue na jaane kab guzar ga.e

ḳhushī ke intizār meñ jo roz-o-shab guzar ga.e

har aane vaale shaḳhs kā dabāv merī samt thā

maiñ rāste se haT gayā to sab ke sab guzar ga.e

mire liye jo vaqt kā shu'ūr le ke aa.e the

mujhe ḳhabar hī tab huī vo lamhe jab guzar ga.e

samundaroñ ke sāhiloñ pe ḳhaak uḌ rahī hai ab

jo tishnagī kī aab the vo tishna-lab guzar ga.e

magar vo tere bām-o-dar kī azmatoñ kā paas thā

tirī galī se be-adab bhī bā-adab guzar ga.e

vafūr-e-imbisāt meñ kise raheñge yaad ham

agar jahān-e-rañg-o-bū se be-sabab guzar ga.e

bajā hai terā ye gila ki maiñ bahut badal gayā

dar-asl mujh pe hādse hī kuchh 'ajab guzar ga.e

kahīñ kahīñ to raah bhī ḳhud ek sadd-e-rāh thī

magar ham aise saḳht-jāñ ba-nām-e-rab guzar ga.e

huī na qadr mehr kī ḳhulūs rā.egāñ gayā

rah-e-vafā se 'rashk' ham vafā-talab guzar ga.e

na jaane kab basar hue na jaane kab guzar gae

KHushi ke intizar mein jo roz-o-shab guzar gae

har aane wale shaKHs ka dabaw meri samt tha

main raste se haT gaya to sab ke sab guzar gae

mere liye jo waqt ka shu'ur le ke aae the

mujhe KHabar hi tab hui wo lamhe jab guzar gae

samundaron ke sahilon pe KHak uD rahi hai ab

jo tishnagi ki aab the wo tishna-lab guzar gae

magar wo tere baam-o-dar ki azmaton ka pas tha

teri gali se be-adab bhi ba-adab guzar gae

wafur-e-imbisat mein kise rahenge yaad hum

agar jahan-e-rang-o-bu se be-sabab guzar gae

baja hai tera ye gila ki main bahut badal gaya

dar-asl mujh pe hadse hi kuchh 'ajab guzar gae

kahin kahin to rah bhi KHud ek sadd-e-rah thi

magar hum aise saKHt-jaan ba-nam-e-rab guzar gae

hui na qadr mehr ki KHulus raegan gaya

rah-e-wafa se 'rashk' hum wafa-talab guzar gae