na jaanta hun ki kya kya hain KHamiyan meri

na jāntā huuñ ki kyā kyā haiñ ḳhāmiyāñ merī

samajh rahā huuñ ki duniyā hai qadr-dāñ merī

na niklī aah laboñ se na aañkh se aañsū

kabhī 'ayāñ na huī sozish-e-nihāñ merī

abhī chhalakne lage un kī aañkh se aañsū

abhī kahī na ga.ī mujh se dāstāñ merī

bahāl-e-taish kisī ko burā-bhalā na kahūñ

ḳhudā kare mire qaabū meñ ho zabāñ merī

ho lā-javāb agar tum to be-misāl huuñ maiñ

sitam sitam hai tumhārā fuġhāñ fuġhāñ merī

ḳhudā kī den hai sab kuchh vo chāhe jab le le

na ghar mirā hai na daulat mirī na jaañ merī

koī sune na sune is se kyā ġharaz mujh ko

ye chāhtā huuñ sune ḳhāliq-e-jahāñ merī

mujhe na Dar hai dikhāyā kare falak āñkheñ

agarche piir huuñ himmat abhī javāñ merī

yahāñ kabhī na banī hai kisī kī ai 'bartar'

kaTegī chain se kyā zer-e-āsmāñ merī

na jaanta hun ki kya kya hain KHamiyan meri

samajh raha hun ki duniya hai qadr-dan meri

na nikli aah labon se na aankh se aansu

kabhi 'ayan na hui sozish-e-nihan meri

abhi chhalakne lage un ki aankh se aansu

abhi kahi na gai mujh se dastan meri

bahaal-e-taish kisi ko bura-bhala na kahun

KHuda kare mere qabu mein ho zaban meri

ho la-jawab agar tum to be-misal hun main

sitam sitam hai tumhaara fughan fughan meri

KHuda ki den hai sab kuchh wo chahe jab le le

na ghar mera hai na daulat meri na jaan meri

koi sune na sune is se kya gharaz mujh ko

ye chahta hun sune KHaliq-e-jahan meri

mujhe na Dar hai dikhaya kare falak aankhen

agarche pir hun himmat abhi jawan meri

yahan kabhi na bani hai kisi ki ai 'bartar'

kaTegi chain se kya zer-e-asman meri