na kam hua hai na ho soz-e-iztirab-e-durun

na kam huā hai na ho soz-e-iztirāb-e-durūñ

tire qarīb rahūñ maiñ ki tujh se duur rahūñ

kahīñ koī tirā mahram hai ai dil-e-mahzūñ

mujhe batā ki kidhar jā.ūñ kis se baat karūñ

tirī nazar ne bahut kuchh sikhā diyā dil ko

kuchh itnā sahl na thā varna kārobār-e-junūñ

pukārtī haiñ mujhe vus.ateñ do-ālam kī

maiñ apne aap se dāman chhuḌā sakūñ to chalūñ

tirī vafā na mujhe raas aa sakī lekin

maiñ sochtā huuñ tujhe kaise bevafā kah duuñ

mirī shikasta-dilī kā na kar ḳhayāl itnā

kahīñ na maiñ tire ḳhvāboñ meñ talḳhiyāñ bhar duuñ

giraft-e-asr-e-ravāñ is qadar to mohlat de

ki miT rahī hai jo duniyā use maiñ dekh to luuñ

ye kis ḳhayāl ne kī hai mirī zabāñ-bandī

tujhī se kahne kī bāteñ tujhī se kah na sakūñ

vo iztirāb-talab thā kisī tavaqqo par

ab uTh chukī hai tavaqqo ab aa chalā hai sukūñ

na kam hua hai na ho soz-e-iztirab-e-durun

tere qarib rahun main ki tujh se dur rahun

kahin koi tera mahram hai ai dil-e-mahzun

mujhe bata ki kidhar jaun kis se baat karun

teri nazar ne bahut kuchh sikha diya dil ko

kuchh itna sahl na tha warna karobar-e-junun

pukarti hain mujhe wusaten do-alam ki

main apne aap se daman chhuDa sakun to chalun

teri wafa na mujhe ras aa saki lekin

main sochta hun tujhe kaise bewafa kah dun

meri shikasta-dili ka na kar KHayal itna

kahin na main tere KHwabon mein talKHiyan bhar dun

giraft-e-asr-e-rawan is qadar to mohlat de

ki miT rahi hai jo duniya use main dekh to lun

ye kis KHayal ne ki hai meri zaban-bandi

tujhi se kahne ki baaten tujhi se kah na sakun

wo iztirab-talab tha kisi tawaqqo par

ab uTh chuki hai tawaqqo ab aa chala hai sukun