na kar to ai dil majbur aah-e-zer-e-labi

na kar to ai dil majbūr āh-e-zer-e-labī

na TuuT jaa.e kahīñ ye sukūt-e-nīm-shabī

ye kāvish-e-ġham-e-pinhāñ hai ishq kā hāsil

ravā nahīñ tirī furqat meñ ārzū-talabī

ḳhudā kare yahīñ ruk jaa.e gardish-e-daurāñ

hai rāzdār-e-mohabbat sukūt-e-nīm-shabī

kahāñ huā hai tū shikva-guzār-e-mahrūmī

jahāñ hai saañs bhī lenā kamāl-e-be-adabī

numūd-e-husn hai goyā sarāb kā aalam

ye kā.enāt hai hañgāma haa.e bulajabī

dikhā rahā huuñ nasheb-o-farāz aalam ke

magar ye dil hai ki hai mahv-e-intihā-talabī

mujhe bhī faḳhr hai is silsile meñ ai 'sāqib'

ḳhudā kā shukr ki huuñ hāshmī-o-muttalabī

na kar to ai dil majbur aah-e-zer-e-labi

na TuT jae kahin ye sukut-e-nim-shabi

ye kawish-e-gham-e-pinhan hai ishq ka hasil

rawa nahin teri furqat mein aarzu-talabi

KHuda kare yahin ruk jae gardish-e-dauran

hai raazdar-e-mohabbat sukut-e-nim-shabi

kahan hua hai tu shikwa-guzar-e-mahrumi

jahan hai sans bhi lena kamal-e-be-adabi

numud-e-husn hai goya sarab ka aalam

ye kaenat hai hangama hae bulajabi

dikha raha hun nasheb-o-faraaz aalam ke

magar ye dil hai ki hai mahw-e-intiha-talabi

mujhe bhi faKHr hai is silsile mein ai 'saqib'

KHuda ka shukr ki hun hashmi-o-muttalabi