na koi dar na daricha na saeban hain hum

na koī dar na darīcha na sā.ebān haiñ ham

koī batā.e ki kis shahr kā nishān haiñ ham

hai terī aañkh meñ aañsū to aa bujhāne aa

ki tere shahr kā jaltā huā makān haiñ ham

na ham pe naaz kare gardish-e-zamāna kyoñ

khañDar libās meñ bhī shahr-e-zī-lisān haiñ ham

guloñ ko qatl bhī kar ke vo log kahte haiñ

jo pūchhiye to haqīqat meñ bāġhbān haiñ ham

ye vaqt roz hī tahrīr kar rahā hai hameñ

ḳhamosh rah ke bhī goyā koī bayān haiñ ham

tū jis maqām pe rakkhe hameñ qubūl hai dost

tirī zamīn haiñ terā hī āsmān haiñ ham

kisī bhī aur ko ham se ho kyā gurez 'shamīm'

fazā-e-dahr meñ apnā hī imtihān haiñ ham

na koi dar na daricha na saeban hain hum

koi batae ki kis shahr ka nishan hain hum

hai teri aankh mein aansu to aa bujhane aa

ki tere shahr ka jalta hua makan hain hum

na hum pe naz kare gardish-e-zamana kyon

khanDar libas mein bhi shahr-e-zi-lisan hain hum

gulon ko qatl bhi kar ke wo log kahte hain

jo puchhiye to haqiqat mein baghban hain hum

ye waqt roz hi tahrir kar raha hai hamein

KHamosh rah ke bhi goya koi bayan hain hum

tu jis maqam pe rakkhe hamein qubul hai dost

teri zamin hain tera hi aasman hain hum

kisi bhi aur ko hum se ho kya gurez 'shamim'

faza-e-dahr mein apna hi imtihan hain hum