نہ کوئی در نہ دریچہ نہ سائبان ہیں ہم

نہ کوئی در نہ دریچہ نہ سائبان ہیں ہم

کوئی بتائے کہ کس شہر کا نشان ہیں ہم

ہے تیری آنکھ میں آنسو تو آ بجھانے آ

کہ تیرے شہر کا جلتا ہوا مکان ہیں ہم

نہ ہم پہ ناز کرے گردش زمانہ کیوں

کھنڈر لباس میں بھی شہر ذی لسان ہیں ہم

گلوں کو قتل بھی کر کے وہ لوگ کہتے ہیں

جو پوچھئے تو حقیقت میں باغبان ہیں ہم

یہ وقت روز ہی تحریر کر رہا ہے ہمیں

خموش رہ کے بھی گویا کوئی بیان ہیں ہم

تو جس مقام پہ رکھے ہمیں قبول ہے دوست

تری زمین ہیں تیرا ہی آسمان ہیں ہم

کسی بھی اور کو ہم سے ہو کیا گریز شمیمؔ

فضائے دہر میں اپنا ہی امتحان ہیں ہم