na puchh mazhab-o-nam-o-nasab sawal na kar

na pūchh maz.hab-o-nām-o-nasab savāl na kar

jo hai tirā hai vahī merā rab savāl na kar

savāl karnā zarūrī hai āgahī ke liye

magar ho āgahī āzār jab savāl na kar

ye terā ḳhaam tajassus na tujh ko bhaTkā de

ye mājrā hai tavajjoh-talab savāl na kar

abhī to shahr-e-tilismāt meñ hai pahlā qadam

tū aa gayā hai to kar sabr ab savāl na kar

kahāñ se rang dhanak dhuup ruup meñ utrī

'atā hai kis kī ye albelī chhab savāl na kar

na pūchh harf sitāroñ meñ Dhal ga.e kaise

suḳhan ko kaise milī tāb-o-tab savāl na kar

safar meñ kaun kahāñ merā saath chhoḌ gayā

nahīñ hai jānñā lāzim ye sab savāl na kar

yahāñ to bas sar-e-taslīm ḳham rahe 'nasrīn'

ye 'ishq hai zarā hadd-e-adab savāl na kar

na puchh mazhab-o-nam-o-nasab sawal na kar

jo hai tera hai wahi mera rab sawal na kar

sawal karna zaruri hai aagahi ke liye

magar ho aagahi aazar jab sawal na kar

ye tera KHam tajassus na tujh ko bhaTka de

ye majra hai tawajjoh-talab sawal na kar

abhi to shahr-e-tilismat mein hai pahla qadam

tu aa gaya hai to kar sabr ab sawal na kar

kahan se rang dhanak dhup rup mein utri

'ata hai kis ki ye albeli chhab sawal na kar

na puchh harf sitaron mein Dhal gae kaise

suKHan ko kaise mili tab-o-tab sawal na kar

safar mein kaun kahan mera sath chhoD gaya

nahin hai jaanna lazim ye sab sawal na kar

yahan to bas sar-e-taslim KHam rahe 'nasrin'

ye 'ishq hai zara hadd-e-adab sawal na kar