na puchh mujhse mere dilruba ke bare mein

na pūchh mujh se mire dilrubā ke baare meñ

maiñ kyā batā.ūñ ab us bevafā ke baare meñ

safar ke vaqt zarā ehtiyāt behtar hai

kisī ḳhizar ke kisī rahnumā ke baare meñ

na koī 'ilm hameñ intihā kī bābat hai

na jānte haiñ abhī ibtidā ke baare meñ

tamām dekhne vāloñ kī raa.e yaksāñ hai

tumhāre shahr kī āb-o-havā ke baare meñ

ḳhudā ke mānñe vāloñ ke paas bhī shāyad

koī dalīl nahīñ hai ḳhudā ke baare meñ

'amal karo to 'umūman qubūl hotī hai

ye tajraba hai hamārā du'ā ke baare meñ

mirā dimāġh burī tarh ghuum jaatā hai

maiñ sochtā huuñ jab arz-o-samā ke baare meñ

suḳhan-sarāoñ ne kyā kyā suḳhan nahīñ bāñdhe

tumhāre naaz tumhārī adā ke baare meñ

huā hai tujh se sadāqat kā irtikāb 'sha'ūr'

kuchh ehtimāl nahīñ ab sazā ke baare meñ

na puchh mujh se mere dilruba ke bare mein

main kya bataun ab us bewafa ke bare mein

safar ke waqt zara ehtiyat behtar hai

kisi KHizar ke kisi rahnuma ke bare mein

na koi 'ilm hamein intiha ki babat hai

na jaante hain abhi ibtida ke bare mein

tamam dekhne walon ki rae yaksan hai

tumhaare shahr ki aab-o-hawa ke bare mein

KHuda ke manne walon ke pas bhi shayad

koi dalil nahin hai KHuda ke bare mein

'amal karo to 'umuman qubul hoti hai

ye tajraba hai hamara du'a ke bare mein

mera dimagh buri tarh ghum jata hai

main sochta hun jab arz-o-sama ke bare mein

suKHan-saraon ne kya kya suKHan nahin bandhe

tumhaare naz tumhaari ada ke bare mein

hua hai tujh se sadaqat ka irtikab 'sha'ur'

kuchh ehtimal nahin ab saza ke bare mein