نہ پوچھ مجھ سے مرے دل ربا کے بارے میں

نہ پوچھ مجھ سے مرے دل ربا کے بارے میں

میں کیا بتاؤں اب اس بے وفا کے بارے میں

سفر کے وقت ذرا احتیاط بہتر ہے

کسی خضر کے کسی رہنما کے بارے میں

نہ کوئی علم ہمیں انتہا کی بابت ہے

نہ جانتے ہیں ابھی ابتدا کے بارے میں

تمام دیکھنے والوں کی رائے یکساں ہے

تمہارے شہر کی آب و ہوا کے بارے میں

خدا کے ماننے والوں کے پاس بھی شاید

کوئی دلیل نہیں ہے خدا کے بارے میں

عمل کرو تو عموماً قبول ہوتی ہے

یہ تجربہ ہے ہمارا دعا کے بارے میں

مرا دماغ بری طرح گھوم جاتا ہے

میں سوچتا ہوں جب ارض و سما کے بارے میں

سخن سراؤں نے کیا کیا سخن نہیں باندھے

تمہارے ناز تمہاری ادا کے بارے میں

ہوا ہے تجھ سے صداقت کا ارتکاب شعورؔ

کچھ احتمال نہیں اب سزا کے بارے میں