na sahi gar unhen KHayal nahin

na sahī gar unheñ ḳhayāl nahīñ

ki hamārā bhī ab vo haal nahīñ

yaad unheñ vāda-e-visāl nahīñ

kab kiyā thā yahī ḳhayāl nahīñ

aise bigḌe vo sun ke shauq kī baat

aaj tak ham se bol-chāl nahīñ

mujh ko ab ġham ye hai ki baad mire

ḳhātir-e-yār be-malāl nahīñ

afv-e-haq kā hai mai-kashoñ pe nuzūl

rezish-e-abr-e-barshagāl nahīñ

ham pe kyuuñ arz-e-hāl-e-dil pe itaab

elchī ko kahīñ zavāl nahīñ

sun ke mujh se vo ḳhvāhish-e-pā-bos

hañs ke kahne lage majāl nahīñ

dil ko hai yaad shauq kā vo hunar

jis se baḌh kar koī kamāl nahīñ

aap nādim na hoñ ki 'hasrat' se

shikva-e-ġham kā ehtimāl nahīñ

na sahi gar unhen KHayal nahin

ki hamara bhi ab wo haal nahin

yaad unhen wada-e-visal nahin

kab kiya tha yahi KHayal nahin

aise bigDe wo sun ke shauq ki baat

aaj tak hum se bol-chaal nahin

mujh ko ab gham ye hai ki baad mere

KHatir-e-yar be-malal nahin

afw-e-haq ka hai mai-kashon pe nuzul

rezish-e-abr-e-barshagal nahin

hum pe kyun arz-e-haal-e-dil pe itab

elchi ko kahin zawal nahin

sun ke mujh se wo KHwahish-e-pa-bos

hans ke kahne lage majal nahin

dil ko hai yaad shauq ka wo hunar

jis se baDh kar koi kamal nahin

aap nadim na hon ki 'hasrat' se

shikwa-e-gham ka ehtimal nahin