نہ ان کی ترجمانی سے نہ ان کو درمیاں کر کے

نہ ان کی ترجمانی سے نہ ان کو درمیاں کر کے

دلوں کا فیصلہ ہوتا ہے آنکھوں کو زباں کر کے

ہمارے غم ہمارے دل کی پاکیزہ امانت ہیں

خیانت ہم سے ہو سکتی نہیں آہ و فغاں کر کے

نگاہوں میں سمائے دل میں اترے روح تک پہنچے

اشارہ بازیاں دل ریزیاں سرگوشیاں کر کے

تم اپنی سلطنت پہ اس قدر نازاں ہو اور ہم نے

بھلا دیں شاہیاں سلطانیاں سرداریاں کر کے

وہ کھو بیٹھے بہ آسانی وقار زندگی اپنا

حماقت خیزیاں بے عقلیاں نادانیاں کر کے

خدا جانے مرے احباب کی کیا مقصدیت ہے

یہ فتنہ خیزیاں بیزاریاں بے مہریاں کر کے

جہاں کو پھر اسی حسن طلسمانہ کی حاجت ہے

دکھا دے ایک پل میں جو خرد کی دھجیاں کر کے