na-rasa aahen meri auj-e-maraatib pa gain

nā-rasā aaheñ mirī auj-e-marātib pā ga.iiñ

dil se niklīñ lab tak aa.iiñ āsmāñ par chhā ga.iiñ

naza.a meñ dil se nikal kar jo zabāñ par aa ga.iiñ

vo sadā.eñ kuchh na thiiñ lekin qayāmat Dhā ga.iiñ

ai nigāh-e-dil-navāz uTh aur mere dil ko dekh

jitnī niklī thiiñ tamannā.eñ phir utnī chhā ga.iiñ

maiñ umīd-e-ġhuncha-o-gul ab karūñ to kyā karūñ

koñpleñ phūTī thiiñ jin shāḳhoñ meñ vo murjhā ga.iiñ

ḳhāna-e-dil meñ ye aalam ārzūoñ kā rahā

chand niklīñ chand Thahrīñ kuchh ga.iiñ kuchh aa ga.iiñ

sab ne jaanā ek apnā ham-vatan kam ho gayā

ġham agar niklā to dil kī hasrateñ ghabrā ga.iiñ

sūrat-e-sailāb mazmūñ kā asar baḌhtā gayā

'nūh'-e-tūfānī kī ġhazleñ ḳhuub shohrat pā ga.iiñ

na-rasa aahen meri auj-e-maraatib pa gain

dil se niklin lab tak aain aasman par chha gain

naza mein dil se nikal kar jo zaban par aa gain

wo sadaen kuchh na thin lekin qayamat Dha gain

ai nigah-e-dil-nawaz uTh aur mere dil ko dekh

jitni nikli thin tamannaen phir utni chha gain

main umid-e-ghuncha-o-gul ab karun to kya karun

konplen phuTi thin jin shaKHon mein wo murjha gain

KHana-e-dil mein ye aalam aarzuon ka raha

chand niklin chand Thahrin kuchh gain kuchh aa gain

sab ne jaana ek apna ham-watan kam ho gaya

gham agar nikla to dil ki hasraten ghabra gain

surat-e-sailab mazmun ka asar baDhta gaya

'nuh'-e-tufani ki ghazlen KHub shohrat pa gain