nagah wo raste se bhaTka to bahut roya

nāgāh vo raste se bhaTkā to bahut royā

muḌ-muḌ ke mujhe dekhā samjhā to bahut royā

vo barhamī se mujh se har rishta bhulā baiThā

jab paas mire ik din aayā to bahut royā

manzūr na thā us ko hijrat kā zamāna par

nāchār ḳhizāñ-rut meñ bichhḌā to bahut royā

ulfat meñ shikast-o-ġham lāzim hai yaqīnan vo

jab karb-e-judā.ī meñ TuuTā to bahut royā

patthar thā tabī'at meñ fitrat meñ bhī talḳhī thī

vo naġhma mirā jab jab gaayā to bahut royā

taqdīr ke kātib ne likkhā thā shikast-o-reḳht

jab apne nasībe kā paayā to bahut royā

merī ye navā goyā ik aah hai hijrat kī

is aah ko lafzoñ meñ Dhālā to bahut royā

mā'sūm thā naTkhaT thā jaanā na tujhe 'fāḳhir'

jab us ne tujhe samjhā jaanā to bahut royā

nagah wo raste se bhaTka to bahut roya

muD-muD ke mujhe dekha samjha to bahut roya

wo barhami se mujh se har rishta bhula baiTha

jab pas mere ek din aaya to bahut roya

manzur na tha us ko hijrat ka zamana par

nachaar KHizan-rut mein bichhDa to bahut roya

ulfat mein shikast-o-gham lazim hai yaqinan wo

jab karb-e-judai mein TuTa to bahut roya

patthar tha tabi'at mein fitrat mein bhi talKHi thi

wo naghma mera jab jab gaya to bahut roya

taqdir ke katib ne likkha tha shikast-o-reKHt

jab apne nasibe ka paya to bahut roya

meri ye nawa goya ek aah hai hijrat ki

is aah ko lafzon mein Dhaala to bahut roya

ma'sum tha naTkhaT tha jaana na tujhe 'faKHir'

jab us ne tujhe samjha jaana to bahut roya