nala-e-dil arsh ki zanjir khinch

nāla-e-dil arsh kī zanjīr khīñch

jazb-e-pinhāñ gesū-e-tāsīr khīñch

dam khiñchā qātil kahīñ shamshīr khīñch

tū ne kī bismil se be-taqsīr khīñch

zaḳhm-e-pinhāñ jazb-e-pinhāñ ho gayā

tan ke ḳhanjar khīñch khiñch kar tiir khīñch

qulqul-e-mīnā hū haq haq sāqiyā

khīñchnī hai to vo pur-tāsīr khīñch

dair ke dar par miTā naqsh-e-jabīñ

ḳhatt-e-dīgar kātib-e-taqdīr khīñch

lā musavvir koī bijlī kā qalam

chulbulī sī shoḳh sī tasvīr khīñch

yā kalā.ī se ulaT de āstīñ

myaan se saffāk yā shamshīr khīñch

haath meñ shāna hai aage aa.ina

apnī tasvīr ai but-e-be-pīr khīñch

zeb-e-peshānī rahe tasvīr-e-yār

kilk-e-mānī yuuñ ḳhat-e-taqdīr khīñch

ai musavvir huuñ shahīd-e-teġh-e-nāz

ḳhūn-e-bismil se mirī tasvīr khīñch

ashk-e-ḳhūñ sharm-e-gunāhāñ se nikāl

dīda-e-tar roġhan-e-iksīr khīñch

ai but-e-saffāk bismillāh kar

shakl-e-ḳhanjar nāra-e-takbīr khīñch

ishq-e-qāmat rutba-e-mansūr de

mujh ko suulī par pa-e-ta.azīr khīñch

muñh dikhā kar chal diyā vo rashk-e-hūr

'rāsiḳh' ab aaheñ dam-e-taqrīr khīñch

nala-e-dil arsh ki zanjir khinch

jazb-e-pinhan gesu-e-tasir khinch

dam khincha qatil kahin shamshir khinch

tu ne ki bismil se be-taqsir khinch

zaKHm-e-pinhan jazb-e-pinhan ho gaya

tan ke KHanjar khinch khinch kar tir khinch

qulqul-e-mina hu haq haq saqiya

khinchni hai to wo pur-tasir khinch

dair ke dar par miTa naqsh-e-jabin

KHatt-e-digar katib-e-taqdir khinch

la musawwir koi bijli ka qalam

chulbuli si shoKH si taswir khinch

ya kalai se ulaT de aastin

myan se saffak ya shamshir khinch

hath mein shana hai aage aaina

apni taswir ai but-e-be-pir khinch

zeb-e-peshani rahe taswir-e-yar

kilk-e-mani yun KHat-e-taqdir khinch

ai musawwir hun shahid-e-tegh-e-naz

KHun-e-bismil se meri taswir khinch

ashk-e-KHun sharm-e-gunahan se nikal

dida-e-tar roghan-e-iksir khinch

ai but-e-saffak bismillah kar

shakl-e-KHanjar nara-e-takbir khinch

ishq-e-qamat rutba-e-mansur de

mujh ko suli par pa-e-tazir khinch

munh dikha kar chal diya wo rashk-e-hur

'rasiKH' ab aahen dam-e-taqrir khinch