نالۂ دل عرش کی زنجیر کھینچ

نالۂ دل عرش کی زنجیر کھینچ

جذب پنہاں گیسوئے تاثیر کھینچ

دم کھنچا قاتل کہیں شمشیر کھینچ

تو نے کی بسمل سے بے تقصیر کھینچ

زخم پنہاں جذب پنہاں ہو گیا

تن کے خنجر کھینچ کھنچ کر تیر کھینچ

قلقل مینا ہو حق حق ساقیا

کھینچنی ہے تو وہ پر تاثیر کھینچ

دیر کے در پر مٹا نقش جبیں

خط دیگر کاتب تقدیر کھینچ

لا مصور کوئی بجلی کا قلم

چلبلی سی شوخ سی تصویر کھینچ

یا کلائی سے الٹ دے آستیں

میان سے سفاک یا شمشیر کھینچ

ہاتھ میں شانہ ہے آگے آئنہ

اپنی تصویر اے بت بے پیر کھینچ

زیب پیشانی رہے تصویر یار

کلک مانی یوں خط تقدیر کھینچ

اے مصور ہوں شہید تیغ ناز

خون بسمل سے مری تصویر کھینچ

اشک خوں شرم گناہاں سے نکال

دیدۂ تر روغن اکسیر کھینچ

اے بت سفاک بسم اللہ کر

شکل خنجر نعرۂ تکبیر کھینچ

عشق قامت رتبۂ منصور دے

مجھ کو سولی پر پئے تعزیر کھینچ

منہ دکھا کر چل دیا وہ رشک حور

راسخؔ اب آہیں دم تقریر کھینچ