nae masiha banenge nae laqab honge

na.e masīhā baneñge na.e laqab hoñge

hamāre mulk meñ phir intiḳhāb ab hoñge

sunā hai phir se na.e ḳhvāb beche jā.eñge

sunā hai phir se na.e jumle zer-e-lab hoñge

jo pāñch saal kabhī yaad tak nahīñ aa.e

vahī ġharīb vo lāchār phir talab hoñge

lo phir se mandir-o-masjid kā jin nikal aayā

lo phir se rahnumā ab ḳhuuñ ke tishna-lab hoñge

chaman meñ bo to rahe ho tum intishār ke biij

is intishār kā lekin shikār sab hoñge

hamāre mulk kā aa.iin ham se kahtā hai

ab inqilāb faqat vote ke sabab hoñge

'shahāb' apne hī jin se na faizyāb hue

tumhāre aur mire ġham-gusār kab hoñge

nae masiha banenge nae laqab honge

hamare mulk mein phir intiKHab ab honge

suna hai phir se nae KHwab beche jaenge

suna hai phir se nae jumle zer-e-lab honge

jo panch sal kabhi yaad tak nahin aae

wahi gharib wo lachaar phir talab honge

lo phir se mandir-o-masjid ka jin nikal aaya

lo phir se rahnuma ab KHun ke tishna-lab honge

chaman mein bo to rahe ho tum intishaar ke bij

is intishaar ka lekin shikar sab honge

hamare mulk ka aain hum se kahta hai

ab inqilab faqat wote ke sabab honge

'shahab' apne hi jin se na faizyab hue

tumhaare aur mere gham-gusar kab honge