nae safinon ko sahil ki duriyan de din

na.e safīnoñ ko sāhil kī dūriyāñ de diiñ

zahīn bachchoñ ke hāthoñ meñ titliyāñ de diiñ

vo ik charāġh na bujh paayā tum se jis ke liye

tamām shahr-e-charāġhāñ ko āñdhiyāñ de diiñ

bahut 'azīm sahī daulat-e-anā lekin

anā-pasandī ne kitnoñ ko sūliyāñ de diiñ

ye hādisa hai ki kuchh vaqt ke ḳhudāoñ ne

musāfiroñ ko sarāboñ ke kashtiyāñ de diiñ

ra.īs-e-shahr muḳhayyar hai is qadar us ne

charāġh māñgne vāloñ ko bijliyāñ de diiñ

yaqīn karte haiñ kuchh log yuuñ nujūmī par

ḳhudā ke haath meñ jaise hatheliyāñ de diiñ

nae safinon ko sahil ki duriyan de din

zahin bachchon ke hathon mein titliyan de din

wo ek charagh na bujh paya tum se jis ke liye

tamam shahr-e-charaghan ko aandhiyan de din

bahut 'azim sahi daulat-e-ana lekin

ana-pasandi ne kitnon ko suliyan de din

ye hadisa hai ki kuchh waqt ke KHudaon ne

musafiron ko sarabon ke kashtiyan de din

rais-e-shahr muKHayyar hai is qadar us ne

charagh mangne walon ko bijliyan de din

yaqin karte hain kuchh log yun nujumi par

KHuda ke hath mein jaise hatheliyan de din