nafrat ki apne dil mein na diwar kar buland

nafrat kī apne dil meñ na dīvār kar buland

insān hai to 'azmat-e-kirdār kar buland

kar pyaar tere sāmne vo sar jhukā.eñge

tū apne dushmanoñ pe na talvār kar buland

jins-e-vafā kī tujh pe khule qadr-o-manzilat

jauhar-shanās dīda-e-bedār kar buland

chūmeñge tere paañv sitāroñ kī manzileñ

shauq-e-safar kā jazba-e-raftār kar buland

ā.īna tujh pe hoñge sab asrār-e-kā.enāt

zauq-e-nigāh chashm-e-talabgār kar buland

mahfil meñ jāñ-nisār haiñ parvāne saiñkaḌoñ

ai sham'-e-husn sho'la-e-ruḳhsār kar buland

nazreñ uThā ke dekh nazāre haiñ muntazir

kuchh to mazāq-e-dīd kā me'yār kar buland

dīvāna apnā kah ke pukāre koī tujhe

itnā to apne 'ishq kā me'yār kar buland

anjām-e-kaj-kulāhī pe 'ibrat kī ik nazar

itnī na kaj-adā.ī se dastār kar buland

rul jaa.e Thokaroñ meñ na ye tāj-e-ḳhusravī

naḳhvat se apne sar ko na zinhār kar buland

ab vaqt aa gayā hai 'ziyā' sū-e-dār chal

haq baat kah ke sar ko sar-e-dār kar buland

nafrat ki apne dil mein na diwar kar buland

insan hai to 'azmat-e-kirdar kar buland

kar pyar tere samne wo sar jhukaenge

tu apne dushmanon pe na talwar kar buland

jins-e-wafa ki tujh pe khule qadr-o-manzilat

jauhar-shanas dida-e-bedar kar buland

chumenge tere panw sitaron ki manzilen

shauq-e-safar ka jazba-e-raftar kar buland

aaina tujh pe honge sab asrar-e-kaenat

zauq-e-nigah chashm-e-talabgar kar buland

mahfil mein jaan-nisar hain parwane sainkaDon

ai sham'-e-husn sho'la-e-ruKHsar kar buland

nazren uTha ke dekh nazare hain muntazir

kuchh to mazaq-e-did ka me'yar kar buland

diwana apna kah ke pukare koi tujhe

itna to apne 'ishq ka me'yar kar buland

anjam-e-kaj-kulahi pe 'ibrat ki ek nazar

itni na kaj-adai se dastar kar buland

rul jae Thokaron mein na ye taj-e-KHusrawi

naKHwat se apne sar ko na zinhaar kar buland

ab waqt aa gaya hai 'ziya' su-e-dar chal

haq baat kah ke sar ko sar-e-dar kar buland