nafrat ki siyasat aam hui iKHlas-o-mohabbat bhul gae

nafrat kī siyāsat 'aam huī iḳhlās-o-mohabbat bhuul ga.e

ham apne buzurgoñ kī hikmat paiġhām-o-nasīhat bhuul ga.e

maz.hab ke maqāsid ik jaise afkār-o-‘aqā.ed yak-rangī

ik raah pe chalne vaale sab sadiyoñ kī rifāqat bhuul ga.e

ye mandir-o-masjid ke jhagḌe ye shaiḳh-o-barahman ke qisse

sab farq-o-zalālat yaad magar īmāñ kī harārat bhuul ga.e

'āshiq haiñ rasūl-e-rab ke sabhī haiñ raam ke dīvāne bhī sabhī

donoñ kī qayādat ke haamī kyoñ naqsh-e-qayādat bhuul ga.e

sāvan ke vo jhūloñ kī shohrat ramzān ke rozoñ kī barkat

holī kī bahāroñ kī halchal 'īdoñ kī sa'ādat bhuul ga.e

haiñ raam ke ġhāzī saif-ba-kaf be-kaif namāzī sang-ba-kaf

donoñ haq ke haamī lekin haq hī kī haqīqat bhuul ga.e

sab jangal kaaT diye lekin zehnoñ se vo vahshī-pan na gayā

ābād haiñ shahroñ meñ lekin tahzīb-o-saqāfat bhuul ga.e

nafrat ki siyasat 'am hui iKHlas-o-mohabbat bhul gae

hum apne buzurgon ki hikmat paigham-o-nasihat bhul gae

mazhab ke maqasid ek jaise afkar-o-‘aqaed yak-rangi

ek rah pe chalne wale sab sadiyon ki rifaqat bhul gae

ye mandir-o-masjid ke jhagDe ye shaiKH-o-barahman ke qisse

sab farq-o-zalalat yaad magar iman ki hararat bhul gae

'ashiq hain rasul-e-rab ke sabhi hain ram ke diwane bhi sabhi

donon ki qayaadat ke hami kyon naqsh-e-qayaadat bhul gae

sawan ke wo jhulon ki shohrat ramzan ke rozon ki barkat

holi ki bahaaron ki halchal 'idon ki sa'adat bhul gae

hain ram ke ghazi saif-ba-kaf be-kaif namazi sang-ba-kaf

donon haq ke hami lekin haq hi ki haqiqat bhul gae

sab jangal kaT diye lekin zehnon se wo wahshi-pan na gaya

aabaad hain shahron mein lekin tahzib-o-saqafat bhul gae