نفسی نفسی کا ہے عالم سب ہوئے نا آشنا

نفسی نفسی کا ہے عالم سب ہوئے نا آشنا

محشر زعم خرد میں کون کس کا آشنا

میں نے بھی باد صبا کے ہاتھ کو بوسے دئے

لمس گیسو سے ترے دست صبا تھا آشنا

آرزو مندی کو ظرف آگہی درکار ہے

پہلے ہونا چاہیے ہم کو تمنا آشنا

اجنبی تہذیب کا ملبوس ہے ہر جسم پر

ہر کوئی اقدار سے اپنی ہوا نا آشنا

باب الفت کا مدرس ہے وہی اس دور میں

جو نہیں حرف محبت سے ذرا سا آشنا

بوالہوس کا ذکر کیا عزم و عمل کے بحر کو

پار کرتے ہیں شناور اور دریا آشنا

عشق صادق تو ہے عنقا اور غالب ہے ہوس

آج کے مجنوں کہاں ابرارؔ لیلیٰ آشنا