nagar mein dil ke ab kuchh bhi nahin hai

nagar meñ dil ke ab kuchh bhī nahīñ hai

yahāñ shor-o-shaġhab kuchh bhī nahīñ hai

ye dil rasman dhaḌaktā jā rahā hai

dhaḌakne kā sabab kuchh bhī nahīñ hai

na jaane kaun kab lahja badal le

ye duniyā hai 'ajab kuchh bhī nahīñ hai

ta'alluq thā to thī nārāzgī bhī

par ab lutf-o-ġhazab kuchh bhī nahīñ hai

na vo pahle se ab ranj-o-alam haiñ

na vo bazm-e-tarab kuchh bhī nahīñ hai

tirī furqat kā kyā ḳhadsha ho dil ko

tirī qurbat meñ jab kuchh bhī nahīñ hai

jo kahnā thā kahā khul kar hamesha

hamāre zer-e-lab kuchh bhī nahīñ hai

na koī maslahat na vaz'-dārī

hameñ jiine kā Dhab kuchh bhī nahīñ hai

mahak ash'ār kī bāñTī jahāñ meñ

par apnā ye kasab kuchh bhī nahīñ hai

bane baiThe haiñ bābā-e-adab vo

jinheñ pās-e-adab kuchh bhī nahīñ hai

maiñ bint-e-ādam-o-havvā huuñ 'arshī'

mirā nām-o-nasab kuchh bhī nahīñ hai

nagar mein dil ke ab kuchh bhi nahin hai

yahan shor-o-shaghab kuchh bhi nahin hai

ye dil rasman dhaDakta ja raha hai

dhaDakne ka sabab kuchh bhi nahin hai

na jaane kaun kab lahja badal le

ye duniya hai 'ajab kuchh bhi nahin hai

ta'alluq tha to thi naraazgi bhi

par ab lutf-o-ghazab kuchh bhi nahin hai

na wo pahle se ab ranj-o-alam hain

na wo bazm-e-tarab kuchh bhi nahin hai

teri furqat ka kya KHadsha ho dil ko

teri qurbat mein jab kuchh bhi nahin hai

jo kahna tha kaha khul kar hamesha

hamare zer-e-lab kuchh bhi nahin hai

na koi maslahat na waz'-dari

hamein jine ka Dhab kuchh bhi nahin hai

mahak ash'ar ki banTi jahan mein

par apna ye kasab kuchh bhi nahin hai

bane baiThe hain baba-e-adab wo

jinhen pas-e-adab kuchh bhi nahin hai

main bint-e-adam-o-hawwa hun 'arshi'

mera nam-o-nasab kuchh bhi nahin hai