nahin hain is darja be-adab hum kahen jo un ke dahan nahin hai

nahīñ haiñ is darja be-adab ham kaheñ jo un ke dahan nahīñ hai

dahan to hai par hai tañg aisā ki jis meñ jā-e-suḳhan nahīñ hai

nahīñ haiñ muhtāj kuchh sabā ke yahāñ tak ab laash ghul ga.ī hai

ki ham ko kaafī hai nik.hat-e-gul ki is qadar bār-e-tan nahīñ hai

hue haiñ is darja be-nishāñ ham na justujū se mileñ kisī ko

ki haiñ ġhubār-e-sabā-parīda kahīñ hamārā vatan nahīñ hai

mile bhī ham ko jo chādar-e-shab to lāġharī se na kaam aa.e

kafan huā bhī agar mayassar to kyā kareñ ham-badan nahīñ hai

karo na minnat-kashī-e-īsā uThāo dast-e-duā ajal ko

shifā ho marham se jis ko hāsil vo merā dāġh-e-kuhan nahīñ hai

ga.e chaman meñ jo sair ko ham to ye kahā dil ne bostāñ meñ

bahār gulshan kī kaun dekhe ki bulbul-e-naġhma-zan nahīñ hai

jalā jo parvāna us ke ġham meñ to pās-e-shart-e-vafā ke baa.is

vo kaun shab hai jo ashk-e-paiham se sham.a kā pur lagan nahīñ hai

ye rahm-e-sayyād bhī sitam hai kare ḳhizāñ meñ jo vā qafas ko

bahār dekhegī kis kī bulbul ki ab vo lutf-e-chaman nahīñ hai

abas takalluf pas-e-fanā hai lahad pe be-chārgāñ kī ham-dam

hameñ to kaafī hai bū-e-sabza jo chādar-e-yāsman nahīñ hai

ye josh-e-vahshat hai in dinoñ meñ ki apne saa.e se huuñ ramīda

kahūñ jo ḳhud ko ġhazāl-e-vahshī to koī aisā hiran nahīñ hai

jo haiñ nazākat-pasand aalim kaheñge be-shak vo munsifī se

bahut haiñ ustād yuuñ to lekin 'nasīm' kā sā suḳhan nahīñ hai

nahin hain is darja be-adab hum kahen jo un ke dahan nahin hai

dahan to hai par hai tang aisa ki jis mein ja-e-suKHan nahin hai

nahin hain muhtaj kuchh saba ke yahan tak ab lash ghul gai hai

ki hum ko kafi hai nikhat-e-gul ki is qadar bar-e-tan nahin hai

hue hain is darja be-nishan hum na justuju se milen kisi ko

ki hain ghubar-e-saba-parida kahin hamara watan nahin hai

mile bhi hum ko jo chadar-e-shab to laghari se na kaam aae

kafan hua bhi agar mayassar to kya karen ham-badan nahin hai

karo na minnat-kashi-e-isa uThao dast-e-dua ajal ko

shifa ho marham se jis ko hasil wo mera dagh-e-kuhan nahin hai

gae chaman mein jo sair ko hum to ye kaha dil ne bostan mein

bahaar gulshan ki kaun dekhe ki bulbul-e-naghma-zan nahin hai

jala jo parwana us ke gham mein to pas-e-shart-e-wafa ke bais

wo kaun shab hai jo ashk-e-paiham se shama ka pur lagan nahin hai

ye rahm-e-sayyaad bhi sitam hai kare KHizan mein jo wa qafas ko

bahaar dekhegi kis ki bulbul ki ab wo lutf-e-chaman nahin hai

abas takalluf pas-e-fana hai lahad pe be-chaargan ki ham-dam

hamein to kafi hai bu-e-sabza jo chadar-e-yasman nahin hai

ye josh-e-wahshat hai in dinon mein ki apne sae se hun ramida

kahun jo KHud ko ghazal-e-wahshi to koi aisa hiran nahin hai

jo hain nazakat-pasand aalim kahenge be-shak wo munsifi se

bahut hain ustad yun to lekin 'nasim' ka sa suKHan nahin hai