nahin ki humne kabhi haal-e-soz-e-jaan na kaha

nahīñ ki ham ne kabhī hāl-e-soz-e-jāñ na kahā

magar ba-hīla-e-ārā.ish-e-bayāñ na kahā

koī ḳhatā na huī jis kī ye mile pādāsh

magar yahī ki zamīnoñ ko āsmāñ na kahā

jis anjuman se huā qissa-e-junūñ āġhāz

vahīñ kabhī na kahā go kahāñ kahāñ na kahā

ye ehtirām-e-ta.alluq ye ehtiyāt to dekh

ki zindagī ko kabhī ham ne rā.egāñ na kahā

tire karam ko karam hī kahā sitam ko sitam

zahe ḳhulūs-e-tamannā ki imtihāñ na kahā

hazār ḳhushk rahā apnī zindagī kā chaman

tirī bahār ko lekin kabhī ḳhizāñ na kahā

hameñ bhī nudrat-e-uslūb thī aziiz magar

unheñ jahāñ hī pukārā ġham-e-jahāñ na kahā

nahin ki hum ne kabhi haal-e-soz-e-jaan na kaha

magar ba-hila-e-araish-e-bayan na kaha

koi KHata na hui jis ki ye mile padash

magar yahi ki zaminon ko aasman na kaha

jis anjuman se hua qissa-e-junun aaghaz

wahin kabhi na kaha go kahan kahan na kaha

ye ehtiram-e-talluq ye ehtiyat to dekh

ki zindagi ko kabhi hum ne raegan na kaha

tere karam ko karam hi kaha sitam ko sitam

zahe KHulus-e-tamanna ki imtihan na kaha

hazar KHushk raha apni zindagi ka chaman

teri bahaar ko lekin kabhi KHizan na kaha

hamein bhi nudrat-e-uslub thi aziz magar

unhen jahan hi pukara gham-e-jahan na kaha