nahin ki KHatm himayat ka silsila kiya jae

nahīñ ki ḳhatm himāyat kā silsila kiyā jaa.e

diyā hai 'ijz to imkān-e-mo'jiza kiyā jaa.e

ham ahl-e-chashm pe tārīkiyāñ jhapaTtī haiñ

hamāre gird sitāroñ ko dā.era kiyā jaa.e

ta'alluqāt meñ lāzim hai tāzgī rakhnā

ġhalat nahīñ jo 'ibādat meñ tajraba kiyā jaa.e

rachī-basī haiñ sabhī lazzateñ to phir kaise

kisī zabān kā tabdīl zā.iqa kiyā jaa.e

ravā nahīñ hameñ maujūdgī farishtoñ kī

ham ai'takāf meñ baiThe haiñ taḳhliya kiyā jaa.e

sabhī ne shart lagā.ī huī hai apne ḳhilāf

yahāñ kisī se bhalā kyā muqābla kiyā jaa.e

maiñ kah rahā huuñ parinda hai fitratan har shaḳhs

mire bayān pe be-lāg tabsira kiyā jaa.e

ham apne aap ko bas ik taraf se dekhte haiñ

hamārī aañkh kā tabdīl zāviya kiyā jaa.e

maiñ kah rahā huuñ bahut bahs kar chuke ham log

maiñ chāhtā huuñ ki ab koī faislā kiyā jaa.e

agar lagāv hai to bārhā bhī jaa.ez hai

agar hai 'ishq to bas ek martaba kiyā jaa.e

hudūd-e-chashm se aage nazar nahīñ jaatī

vasī' aur hamārā mushāhida kiyā jaa.e

is irtiqā ke marāhil meñ ye guzārish hai

ki sirf ham se hamārā muvāzana kiyā jaa.e

haiñ is laḌā.ī meñ 'āsim' sharīk ham donoñ

ye sochtā huuñ ki dushman se mashvara kiyā jaa.e

nahin ki KHatm himayat ka silsila kiya jae

diya hai 'ijz to imkan-e-mo'jiza kiya jae

hum ahl-e-chashm pe tarikiyan jhapaTti hain

hamare gird sitaron ko daera kiya jae

ta'alluqat mein lazim hai tazgi rakhna

ghalat nahin jo 'ibaadat mein tajraba kiya jae

rachi-basi hain sabhi lazzaten to phir kaise

kisi zaban ka tabdil zaiqa kiya jae

rawa nahin hamein maujudgi farishton ki

hum ai'takaf mein baiThe hain taKHliya kiya jae

sabhi ne shart lagai hui hai apne KHilaf

yahan kisi se bhala kya muqabla kiya jae

main kah raha hun parinda hai fitratan har shaKHs

mere bayan pe be-lag tabsira kiya jae

hum apne aap ko bas ek taraf se dekhte hain

hamari aankh ka tabdil zawiya kiya jae

main kah raha hun bahut bahs kar chuke hum log

main chahta hun ki ab koi faisla kiya jae

agar lagaw hai to barha bhi jaez hai

agar hai 'ishq to bas ek martaba kiya jae

hudud-e-chashm se aage nazar nahin jati

wasi' aur hamara mushahida kiya jae

is irtiqa ke marahil mein ye guzarish hai

ki sirf hum se hamara muwazana kiya jae

hain is laDai mein 'asim' sharik hum donon

ye sochta hun ki dushman se mashwara kiya jae