nahin malum raaton ka andhera kis ko takta hai

nahīñ mā'lūm rātoñ kā añdherā kis ko taktā hai

hamārā sar misāl-e-mehr neze par chamaktā hai

vafūr-e-tishnagī ne kis balā kā sehr phūñkā thā

samandar aaj tak mere ta'āqub meñ bhaTaktā hai

rageñ barbat kī TūTeñ zaḳhma-gar kī ḳhud-sarā.ī se

ḳharosh-e-nāla-e-ġham mahfiloñ meñ sar paTaktā hai

havā-e-jazba-e-tā’mīr ne bastī miTā Daalī

havā-e-shorish-e-taḳhrīb se jangal mahaktā hai

isī dīvāngī meñ manzileñ gum ho ga.iiñ mujh se

mirā ham-zād mere saath kitnā dauḌ saktā hai

na jaane ham se kyā kahne ko aa.ī hai ye tanhā.ī

ka.ī din se zabāñ par qufl hai hoñToñ pe sakta hai

'urūj' aisī diloñ meñ chāñdnī pahle na phailī thī

na jaane kaun mahvash apne dāman ko jhaTaktā hai

nahin ma'lum raaton ka andhera kis ko takta hai

hamara sar misal-e-mehr neze par chamakta hai

wafur-e-tishnagi ne kis bala ka sehr phunka tha

samandar aaj tak mere ta'aqub mein bhaTakta hai

ragen barbat ki TuTen zaKHma-gar ki KHud-sarai se

KHarosh-e-nala-e-gham mahfilon mein sar paTakta hai

hawa-e-jazba-e-ta’mir ne basti miTa Dali

hawa-e-shorish-e-taKHrib se jangal mahakta hai

isi diwangi mein manzilen gum ho gain mujh se

mera ham-zad mere sath kitna dauD sakta hai

na jaane hum se kya kahne ko aai hai ye tanhai

kai din se zaban par qufl hai honTon pe sakta hai

'uruj' aisi dilon mein chandni pahle na phaili thi

na jaane kaun mahwash apne daman ko jhaTakta hai