نہیں پیتا میں پر نوازش ہوئی ہے

نہیں پیتا میں پر نوازش ہوئی ہے

بڑی موسموں کی سفارش ہوئی ہے

بہت دن سے صحرا کے جیسا یہ دل ہے

نہ بادل گھرے ہیں نہ بارش ہوئی ہے

یہاں ہے بلندی جو کردار کی تو

وہاں خال و خد کی نمائش ہوئی ہے

تری جھیل جیسی جو دیکھی ہیں آنکھیں

مری ڈوب جانے کی خواہش ہوئی ہے

چھلکتا نہیں خون زخموں سے ایسے

کہیں ناخنوں کی بھی کاوش ہوئی ہے

ہمیں عشق میں مبتلا کر رہے ہیں

نظر اور دل میں یہ سازش ہوئی ہے

وہاں دشمنوں کی بڑی یاد آئی

جہاں دوستوں کی نوازش ہوئی ہے

وفاداریوں کا صلہ مل رہا ہے

ہماری صدا آزمائش ہوئی ہے

پریشانیوں میں جو ہم مبتلا ہیں

یقیناً کوئی ہم سے لغزش ہوئی ہے

وہیں اپنی آنکھوں کو ہم چھوڑ آئے

جہاں منظروں کی نمائش ہوئی ہے

رقیبوں کو ہے چھوٹ محفل میں ان کی

مرے آنے جانے پہ بندش ہوئی ہے

غزل کہنا فاروقؔ میں چھوڑ دوں گا

اسی بات پر ان سے رنجش ہوئی ہے